مانو کے پروفیسر فضل الرحمن، اردو یونیورسٹی کرنول کے وائس چانسلر مقرر

حیدرآباد، 16 فروری (پریس نوٹ) مولانا آزاد نیشنل اردو یونیورسٹی، مرکز برائے فروغ انسانی وسائل کے ڈائرکٹر پروفیسر پی فضل الرحمن کو ڈاکٹر مولوی عبدالحق اردو یونیورسٹی (داہو)، کرنول، آندھرا پردیش کا وائس چانسلر مقرر کیا گیا ہے۔ محکمہ اعلیٰ تعلیم، حکومت آندھرا پردیش کے جاری کردہ اعلامیہ کے بموجب گورنر جناب بسوابھوشن ہری چندن نے بحیثیت چانسلر یونیورسٹی، پروفیسر پی فضل الرحمن کو 4 سال کے لیے داہو کا وائس چانسلر مقرر کیا ہے۔
پروفیسر رحمن 1998ءمیں اردو یونیورسٹی سے وابستہ ہونے والے پہلے ملازم ہیں ۔یو جی سی اکیڈیمک اسٹاف کالج میں 2007 میں پروفیسر ڈائرکٹر بننے سے قبل انہوں نے اسسٹنٹ ڈائرکٹر اور ریڈر کی حیثیت سے خدمات انجام دیں۔ 2013ءمیں پروفیسر، اسکول آف سائنسس اور 2019ءمیں ڈائرکٹر، یو جی سی ایچ آر ڈی سی مقرر ہوئے۔ انہوں نے یونیورسٹی میں کئی اہم ذمہ داریاں نبھائیں ہیں ۔ ان میں کنٹرولر امتحانات انچارج، ڈائرکٹر انچارج(نظامت فاصلاتی تعلیم)، ڈائرکٹر نظامت داخلہ و آئی کیو اے سی، ڈین اسکول آف سائنسس و بہبودی ¿ طلبہ کے علاوہ رکن مجلس انتظامی اور رکن مجلس تعلیمی شامل ہیں۔
انہوں نے زوالوجی میں اپنی پی ایچ ڈی 1993ءمیں علی گڑھ مسلم یونیورسٹی سے مکمل کی۔ انہیں 27 سال کا تدریس، تحقیق و تعلیمی انتظامیہ، ادارہ کے قیام، فروغ و انتظام کا تجربہ ہے۔ انہوں نے امریکہ، برطانیہ، فرانس، نیدر لینڈس، آسٹریلیا، متحدہ عرب امارات اور قطر کے تعلیمی دورے کیے ہیں۔ وہ کتاب ”نیماٹوڈس ٹیکسیمونی: کانسپٹس اینڈ ریسنٹ ٹرینڈس“ کے شریک مصنف ہیں۔ انہوں نے مختلف بین الاقوامی سمیناروں اور کانفرنسوں میں شرکت کی ہے۔ انہیں یونیورسٹی گرانٹس کمیشن کی جانب سے مختلف تعلیمی کمیٹیوں میں رکن مقرر کیا گیا ہے۔پروفیسرسید عین الحسن، وائس چانسلر، پروفیسر ایس ایم رحمت اللہ، پرو وائس چانسلر، پروفیسر شیخ اشتیاق احمد، رجسٹرار اور مانو کے تدریسی و غیرتدریسی عملہ نے انہیں مبارکباد پیش کرتے ہوئے نیک تمناﺅں کا اظہار کیا ہے۔

کیرالہ کے اردو اساتذہ کوشعبہ اُردو، مانو میں استقبالیہ
حیدرآباد، 16 فروری (پریس نوٹ) کیرالہ کے اردو اساتذہ کے ایک گروپ نے آج مولانا آزاد نیشنل اردو یونیورسٹی کا دورہ کیا۔ ان اساتذہ کے اعزاز میں شعبہ اردو میں استقبالیہ نشست منعقد کی گئی۔ یہ سبھی اساتذہ کیرالہ کی تنظیم تحریک ِاردو سے وابستہ ہیں اور کیرالہ میں اردو تعلیم کے فروغ کے لیے کوشاں ہیں۔صدر شعبہ اردو پروفیسر فاروق بخشی نے اس موقعے پر کہا کہ مولانا آزاد نیشنل اردو یونیورسٹی میں کیرالہ کے طلبہ کی ایک بڑی تعداد تحصیل علم کی خاطر آتی ہے۔آپ کی آمد سے مجھے امید ہے کہ اس میں مزید اضافہ ہو گا۔ آپ لوگوں نے یہاں کا ماحول اپنی آنکھوںسے دیکھا ہے۔ آپ لوگوں کو اندازہ ہوگیا ہوگا کہ طلبہ کے لیے یہاں جو آسانیاں اور سہولیات فراہم ہیں وہ بالکل منفرد ہیں۔خاص طور سے طالبات کے لیے جو محفوظ فضا ہے وہ دور دور تک آپ کو نہیں ملے گی۔
کیرالہ سے آئے مہمان اساتذہ نے بھی اپنے خیالات کا اظہار کرتے ہوئے کہا کہ اردو یونیورسٹی آکر بے انتہا مسرت کا احساس ہو رہا ہے۔ یہاں کی علمی فضا مبہوت کردینے والی ہے۔ گروپ میں شامل عبدالسلام کے کے، عبدالسلام این، عبدالستار ایم پی نے بھی اپنے خیالات کا اظہار کیا۔اس موقعے پر مہمانوںکی شال پوشی بھی کی گئی اور شعبہ ¿ اردو، مانو کے اساتذہ نے معزز مہمانوں کو اپنی کتابوں کا ایک ایک سیٹ بھی پیش کیا۔ اس موقع پر اساتذہ پروفیسر مسرت جہاں، داکٹر ابو شہیم خاںاور ڈاکٹر فیروز عالم بھی موجود تھے۔ نشست کی نظامت کے فرائض ڈاکٹر جابر حمزہ نے ادا کیے۔